Навучэнцы Барчыцкай сярэдняй школы Кіраўскага раёна працуюць на ўборцы ўраджаю. У складзе сельскагаспадарчага студатрада вучні праводзяць лета з карысцю і спрабуюць зарабіць свае першыя грошы, паведамляе карэспандэнт «Настаўніцкай газеты».
— Наш педагагічны калектыў вялікую ўвагу ўдзяляе працоўнаму выхаванню навучэнцаў, таму такія формы занятасці ў перыяд летніх канікул запатрабаваны сярод іх. У чэрвені арганізавалі лагер працы і адпачынку. У ліпені, калі ў калгасах гарачая пара ўборачнай, традыцыйна фарміруем студэнцкі атрад. Жадаючых папрацаваць заўсёды шмат, — паведаміла намеснік дырэктара па выхаваўчай рабоце Галіна Сямёнава.
Сёлета ў складзе студатрада 16 хлопцаў і дзяўчат. Гэта практычна ўсе старшакласнікі школы. На току сельгаспрадпрыемства «Барчыцы-агра» яны займаюцца падрыхтоўкай зерня да адпраўкі на захоўванне і прыбіраннем тэрыторыі.
Работа навучэнцаў арганізавана ў адпаведнасці з заканадаўствам. Працуюць яны па 4 гадзіны ў дзень, з імі заключаны працоўныя дагаворы, выдадзена спецадзенне і інвентар.
Са сваімі абавязкамі школьнікі спраўляюцца добра. Не адмаўляюцца ні ад якой работы, адказна выконваюць усе заданні, імкнуцца захаваць кожнае зярнятка новага ўраджаю. Такімі стараннымі памочнікамі ў калгасе вельмі задаволены.
У сельскагаспадарчым атрадзе навучэнцы Барчыцкай школы будуць працаваць на працягу 10 дзён. З улікам чатырохгадзіннага рабочага дня кожны з іх атрымае зарплату каля 300 рублёў і прэмію ад калгаса.