Вельмі важна, выбіраючы шлях у дарослае жыццё, валодаць ведамі пра асноўныя накірункі развіцця сацыяльна-эканамічнага комплексу нашай краіны, новыя спецыяльнасці і мадэлі прафесійнай адукацыі розных узроўняў, перавагу ў атрыманні рабочых прафесій і іх неабходнасць сёння на рынку працы, магчымасці далейшага працаўладкавання.
Навучальныя ўстановы прапануюць шмат розных спецыяльнасцей, а выбар трэба зрабіць на карысць адной. Для таго, каб не памыліцца, неабходна загадзя пазнаёміцца з прафесіямі. Значную дапамогу ў гэтым аказвае правядзенне прафарыентацыйных сустрэч, падчас якіх можна атрымаць шмат карыснай інфармацыі.

Сёлета ў нашым раёне 62 вучні 11 класаў і 188 – 9 класаў школ раёна стануць выпускнікамі. Зараз перад рабятамі стаіць няпростая задача – вызначыцца са сваёй будучай прафесіяй. Зрабіць правільны выбар вельмі важна, бо ўсім хочацца ў будучым быць запатрабаванымі на рынку працы, паспяховымі ў жыцці, атрымліваць дастойную зарплату.
“Мы выбіраем прафесію” – такім быў своеасаблівы дэвіз сёлетняй прафарыентацыйный сустрэчы з выпускнікамі школ раёна, што адбылася ў дзіцячай школе мастацтваў.
Метадыст раённага вучэбна-метадычнага кабінета Ірына Кійко давяла да ведама рабят інфармацыю аб найбольш запатрабаваных прафесіях і вакансіях у нашым раёне. Агучыла лічбы, якія сведчаць аб колькасці рабят вызначыўшыхся ўжо са сваёй будучай прафесіяй.
Старшы інспектар аддзела інтэнсіфікацыі вытворчасці ўпраўлення па сельскай гаспадарцы і харчаванні райвыканкама Вольга Каранкевіч давяла да ведама рабят інфармацыю аб вакансіях у аграпрамысловым сектары раёна, найбольш запатрабаваных прафесіях у галінах жывёлагадоўлі і раслінаводства, прывяла прыклады дастойных заробкаў шэрагу спецыялістаў, а таксама расказала аб прывелегіях для маладых спецыялістаў у АПК.
Па традыцыі, знаёмства з навучальнымі ўстановамі праходзіла ў форме размовы і дэманстрацыі прэзентацый. Старшакласнікі мелі магчымасць даведацца не толькі пра паступленне ў тую ці іншую навучальную ўстанову, але і створаных там умовах для вучобы, пражывання і правядзення вольнага часу.

Падчас мерапрыемства шмат цікавага пачулі рабяты аб атрыманні прафесійна-тэхнічнай адукацыі ў Бабруйскім аграрна-эканамічным, Клічаўскім аграрна-тэхнічным, а таксама ў Жыліцкім, Бабруйскім медыцынскім, Бабруйскім індустрыяльна-будаўнічым каледжах.
У сваіх выступленнях прадстаўнікі навучальных устаноў звярталі ўвагу на тое, што існуючае ў грамадстве меркаванне аб «непрэстыжнасці» прафесійна-тэхнічнай адукацыі з’яўляецца памылковым. Справа ў тым, што на сучасным рынку працы востра адчуваецца запатрабаванасць у свайго роду «тэхнічнай эліце»: рабочых і служачых з добра развітымі практычнымі навыкамі працоўнай дзейнасці. Акрамя таго, атрыманне прафесійна-тэхнічнай адукацыі з’яўляецца больш даступным і мае шэраг пераваг перад працягам навучання ў школе. Вялася таксама размова аб адрозненні прэстыжнай прафесіі ад запатрабаванай, аб прызванні і асабістых якасцях, якія неабходны ў той ці іншай сферах дзейнасці.
Падчас сустрэчы рабяты мелі магчымасць задаць хвалюючыя іх пытанні і атрымаць вычарпальныя адказы, кожны жадаючы атрымаў інфармацыйныя брашуры з умовамі паступлення ў навучальныя ўстановы.
Людміла СЯМЁНАВА.
Фота аўтара.

Вучні, удзельнікі прафарыентацыйнага мерапрыемства, падзяліліся сваімі меркаваннямі:
Мікіта КУЦЯНКОЎ, вучань 11 класа СШ №2 імя К.П.Арлоўскага:
– Зрабіць правільны выбар прафесіі даволі няпроста: тэхналогіі імкліва развіваюцца, некаторыя спецыяльнасці знікаюць на рынку працы, іншыя, наадварот, становяцца папулярнымі. Таму для нас удзел у прафарыентацыйных сустрэчах неабходны. Па-першае, большасць вучняў пакуль не вызначыліся з будучай прафесіяй, і прагучаўшая на такіх сустрэчах інфармацыя вельмі дапаможа. Па-другое, нават калі ўжо вызначыўся з навучальнай установай, не факт, што паступіш, таму мець «запасны варыянт» будзе не лішнім.
Сам я планую звязаць сваё працоўнае жыццё з медыцынай. Хачу паступаць у Віцебскі медуніверсітэт. У будучым вельмі хацелася б заняцца лячэннем лю-
дзей з анкалагічнымі захворваннямі. Зараз імкнуся добра вучыцца, каб мець магчымасць паступіць.

Мілана ТАРАБУЕВА, вучаніца 10 класа СШ №2 імя К.П.Арлоўскага:
– Лічу, што падобныя прафарыентацыйныя сустрэчы вельмі неабходныя. Ёсць магчымасць не толькі пачуць пра ўмовы паступлення і навучання ў той ці іншай навучальнай установе, але і даведацца аб найбольш запатрабаваных і высокааплатных прафесіях. Вось я, напрыклад, даведалася, што прафесія медыка, якую планую атрымаць у Бабруйскім медыцынскім каледжы, на працягу некалькіх год у ліку адной з самых запатрабаваных. Гэта значыць, што пасля атрымання спецыяльнасці не будзе праблем з працаўладкаваннем.
У мяне наперадзе яшчэ 11 клас. Буду і надалей старанна вучыцца, бо для паступлення ў медкаледж на бюджэт неабходны высокія балы.
Падчас адбыўшагася мерапрыемства пераканалася, што сёння ў нас шырокі выбар навучальных устаноў для паступлення і атрымання найбольш запатрабаваных на рынку працы прафесій.